Aspronaga

Zientzia Azoka premia ao alumnado de Aspronaga polo seu proxecto de impresión 3D

11.05.2019 “Inesperado e moi emocionante!!!. Na nosa viaxe a Bilbao, o proxecto do colexio de Aspronaga tivo un novo premio!. Se gañar a Open Science de Cambre foi algo especial, esta fin de semana viviuse unha experiencia moi emocionante. Sobran as palabras”. Así manifestaban a súa alegría os dez estudantes e 4 docentes do Centro de Educación Especial Nosa Señora de Lourdes- Aspronaga que participaron, o pasado sábado 11 de maio, na feira Zientzia Azoka, ao recibir o premio ao seu proxecto de impresión 3D.

A presenza do colexio de educación especial coruñés en Bilbao é grazas ao premio conseguido polo centro na Open Science Cambre, celebrada o pasado setembro. Por aquel entón, o xurado destacou “A creatividade, a capacidade comunicativa e a paixón dos participantes da caseta” ao outorgar o premio ao “Mellor experimento”, na categoría de “Científicos Novos” de Educación Secundaria, aos alumnos con discapacidade intelectual do CEE Nosa Señora de Lourdes - Aspronaga. Nesta ocasión, o proxecto científico foi premiado cunha estancia de 2 días no IK4, un referente europeo en desenvolvemento tecnolóxico, sito en Guipúscoa.

MakerLourdes

O acceso das persoas con discapacidade a determinados útiles ou ferramentas específicas é, en moitos casos, difícil (prezos elevados, tendas especializadas, tempos de envío longos…) ou imposible (non é rendible fabricalos para un sector tan pequeno da sociedade). Este proxecto do CEE Nosa Señora de Lourdes pretende crear un banco de modelos 3D imprimibles baixo licenza Creative Commons que poidan ser usados libremente e adaptalos ás necesidades concretas dunha persoa, así como achegar o mundo da discapacidade á sociedade (sensibilizando nas necesidades específicas que padecer unha discapacidade conleva) e a impresión 3D como unha vía para paliar esas desigualdades.