Deportistas de ASPRONAGA e Special OlympicsGalicia presentan os 20º Xogos de Baloncesto
O concelleiro de Deportes da Coruña, José Manuel Sande; Antonio Naya, representante de ASPRONAGA e Antonio Fuentetaja, xerente de Special Olympics Galicia, acompañaron esta mañá a Pedro Suárez, Miguel Cañás e Sergio Barbeito, tres deportistas que participarán o domingo nos Xogos de Baloncesto e que nos explicaron hoxe no Concello en que consistirán as probas.
O Concelleiro de Deportes quixo destacar "a visión do deporte de Special Olympics Galicia, que premia ás Boas Prácticas e fomenta os valores positivos de unidade, respecto e xogo limpo." Pola súa banda, o xerente da entidade deportiva Antonio Fuentetaja, destacou "o importante labor dos 70 voluntarios que nos acompañarán o domingo, e sen os cales sería imposible a realización dos xogos." Finalmente, o representante de ASPRONAGA, Antonio Naya, agradeceu e animou a todos os deportistas. "Estamos encantados de que Special Olympics Galicia contase connosco un ano máis para a organización duns xogos tan importantes e que moven a tantas persoas como son os xogos de Baloncesto. Igualmente quero animar a todos os deportistas que van participar, pois eles son os verdadeiros protagonistas desta actividade".
Os 20º Xogos de Baloncesto para persoas con discapacidade intelectual, contarán coa participación de 20 asociacións, que desprazarán un total de 246 deportistas con discapacidade intelectual e 59 adestradores e adestradoras. A xornada deportiva, aberta ao público e de entrada gratuíta, inaugurarase ás 10:45 horas, na Cidade deportiva de Riazor. Alí contaremos coa presenza do Alcalde D. Xullo Xosé Ferreiro, quen inaugurará a xornada e presenciará o desfile de todos os deportistas das entidades participantes.
